بفكر زي البيزنس، بصمم زي المستخدم، وبابني بالـ AI.

البداية كانت فوتوشوب، وفضول إني أعرف الصورة دي اتعملت إزاي.

2020 كانت سنة توهان. ماكنتش عارف أنا رايح فين، فبدأت بأبسط حاجة قدامي: ICDL وبرامج الأوفيس. ماكانتش خطوة كبيرة، بس كانت حركة.

بعدها دخلت دبلومة جرافيك ديزاين في Graphic School، وهنا التصميم بقى طريق. قعدت حوالي 3 سنين بعمل thumbnails فريلانس، واشتغلت مع مدرسين كتير، ودخلت مسابقات تصميم. مرات كسبت، ومرات خسرت. بس الـ thumbnails علمتني أهم درس في شغلي كله: عندك ثانية واحدة بس عشان تشد انتباه حد.

في 2023 و2024 دخلت عالم الـ visuals، واشتغلت عليه لحد ما بقى لغتي. وبعدها اشتغلت مع شركة ماركتينج كمصمم visuals وحملات. التجربة دي علمتني الماركت بيشتغل إزاي، بس علمتني حاجة أهم: لأول مرة حسيت إني شايل جزء من مسؤولية الشركة، مش بس بنفذ المطلوب. ولما بدأت أدير مشاريع صغيرة لنفسي، اتأكدت إن روح الإدارة دي جزء مني.

في 2025 دخلت عالم الـ UI/UX، و4 شهور مع Route. وبدل ما أستنى شغل، اشتغلت على مشاريع حقيقية مع فرق ستارت اب ومشاريع تخرج. وهنا اتصدمت: البيزنس طلع أعقد بكتير من اللي كنت متخيله. فبدأت أتعلم البيزنس بيفكر إزاي، وأدمجه مع الـ UX، لحد ما بقيت Product Designer.

بس فضلت حاجة مضايقاني: كنت دايماً بشوف المشكلة وأقترح الحل، والحل بيفضل على الشاشة.

عشان كده في 2026 خدت دبلومتين في الـ RPA والـ Automation. اتعلمت أبني workflows بتشيل الشغل الروتيني من على الناس، وتنقل البيانات بين الأنظمة، واتعلمت إزاي الـ RPA بيتعامل مع أنظمة كبيرة زي SAP وOracle، ودي أنظمة طموحي إني أشتغل عليها.

وفي نفس السنة، خدت 3 شهادات من Anthropic، منهم شهادة في Claude Code. اتعلمت إن الفرق مش في إنك تستخدم الـ AI، الفرق في إنك تعرف تكلمه. ودلوقتي الـ AI جزء من كل مرحلة في شغلي، وبيختصرلي جزء كبير من الوقت والمجهود. والموقع اللي إنت فيه دلوقتي اتصمم واتبنى بالطريقة دي.

النهارده أنا Product Designer بيفهم البيزنس، وبيصمم الحل، وبيعرف يبنيه كمان.